Aptek və marketlərin iş rejimində dəyişiklik olmayacaq – Rəsmi

Aptek və marketlərin iş rejimində dəyişiklik olmayacaq

Sabahdan Azərbaycanda tətbiq olunacaq xüsusi rejimlə əlaqədar aptek, ərzaq mağazaları, market və supermarketlərin iş rejimində dəyişiklik olmayacaq.

Bu barədə “Qafqazinfo” Azərbaycan Respublikası Nazirlər Kabineti yanında Operativ Qərargaha istinadla xəbər verir.

Ölkə üzrə fəaliyyət göstərən alış-veriş mərkəzlərinin fəaliyyəti isə müvafiq dövlət strukturları tərəfindən açıqlanacaq qaydalara riayət olunaraq həyata keçiriləcək.

Qeyd edək ki, 14 mart 2020-ci il saat 00:00-dan etibarən ölkə ərazisində sosial izolyasiya tədbirləri tətbiq olunacaq. Tətbiq olunan xüsusi rejim bir ay davam edəcək.

Onu da bildirək ki, sosial şəbəkələrdə və “WhatsApp” ani mesajlaşma əlavələri vasitəsilə koronavirus infeksiyasının yayılmasına yol verməmək üçün Bakı şəhərində ərzaq mağazalarının bağlanacağı və onların iş rejiminə ciddi fasilələr tətbiq olunacağı barədə səs yazısı yayılır. Azərbaycan Respublikası Nazirlər Kabineti yanında Operativ Qərargahdan bildirilib ki, yayılan iddia şayiə xarakterlidir və cəmiyyətdə süni ajiotaj yaratmaq məqsədi daşıyır. Hazırda aidiyyəti orqanlar tərəfindən bu tipli şayiə yayan şəxslərin aşkarlanması və onların barəsində hüquqi məsuliyyət tədbirləri görülməsi üçün müvafiq iş aparılır.

Bir cavab yazın